Yaponiyanın ənənəvi oyunlarının zəngin tarixi var. Oyunlarla tanış olduqda ölkənin tarixi və mədəniyyəti haqqında daha çox məlumat əldə etmək olur. Yaponiyada maraqlı bir sıra silsilə oyunlar var ki, məhz Yeni il bayramı günlərində insanlar bir araya gəlib onları oynayırlar. Bunlara hanetsuki, otedama, takoage, oniqokko, karuta, fukuvarai və s. aiddir.
Hanetsuki (羽根突き və ya 羽子突き) Yaponiyanın ənənəvi “badminton”udur (həm də oibane (追い羽根, 追羽根, 追羽子) adlanır). Lakin burada “raketka” qismində dördbucaqlı, torsuz taxta “kürək”dən istifadə olunur. Kürəyin adı yaponca haqoita (羽子板, はごいた), rəngbərəng “tüklü” badminton topunun adı isə hanedir. Əvvəllər hanetsukini sadəcə xanımlar Yeni il bayramı günü (Oşoqatsu) oynasalar da, Muramaçi dövründən (1333 -1568) geniş kütlə və hər iki cins arasında yayılmağa başlayır.
Oyunun mahiyyəti bir şəxsin topu haqoita vasitəsilə özündə (çiləyərək) daha çox saxlaya bilməsi və ya iki şəxsin bir-birinə atmasından ibarətdir. Haqoita ilə topu vura bilməyən şəxsin üzündə mürəkkəblə uduzduğuna diar işarə vurulurdu. İnanclara görə, topu daha çox havada saxlayan oyunçular gələn il ağcaqanadlardan daha çox qorunacaqlarmış 😀 .
Hanetsuki müasir dövrdə elə də məşhur olmasa da haqoita və hane hər yerdə satılır. Haqoita daha çox dekorativ funksiya daşımağa başlayıb. Onlar mürəkkəb ipək kollajlar, ənənəvi simvollarla bəzədilərək lakla boyanırlar. Dekorativ haqoita hazırlamaq sənəti bu gün də geniş yayılıb. Daha çox dekabr ayında keçirilən haqoita içi yarmarkalarında satılırlar (Tokyoda Asakusa, Furukava Fudo).
Sevinc Nur © yapon.az 2019
